सामान्य वर्षामा पनि जलमग्न हुने विराटनगर उपमहानगरपालिकाको समस्या अब समाधान हुने भएको छ । विराटनगर उपमहानगरपालिकाले नगरलाई २ वर्ष भित्र डुवानमुक्त पार्ने परियोजनाको काम सुरु गरिसकेकाले अबको केहि समय पश्चात नै यो समस्याबाट नगरवासीले मुक्ति पाउने भएका हुन् ।
सडक, ढल र नगर विकासका लागि एसियाली विकास बैङ्कको सहयोगमा विराटनगर उपमहानगरपालिकाले नगरभित्र विभिन्न परियोजनाको काम सुरु गरिसकेको छ । २ अर्ब ३९ करोडको बजेटमा मझौला सहरको एकीकृत वातावरणीय सुधार परियोजनाले २०१६ सम्ममा सम्पूर्ण विकास निर्माणका काम पुरा गर्नेगरी कालिका कन्ट्रक्सनलाई ठेक्का लगाएको छ । अहिले बर्खाको पानी निकास हुने नालाको काम धमाधम भइरहेको छ । बर्खाको पानी निकास हुने यो नालाको जेठसम्ममा निर्माण कार्य सम्पन्न हुने परियोजनाका व्यवस्थापक उपेन्द्र बरालले बताउनुभयो ।
राजवंशी चौकदेखि रोडसेसचोकसम्म मेन रोडको पूर्वपट्टिको नालाको पानी सिङ्गिया खोलामा र पश्चिमपट्टिको पनि बस्ता खोला हुदै केसलीया खोलामा मिसिने उहाले जानकारी दिनुभयो । सो नाला बनिसकेपछि उपमहानगरपालिका को डुवान समस्या समाधान हुने कार्यकारी अधिकृत गोपाल रेग्मीले बताउनुभयो ।
२५ किलो मिटरको सो नालाको निर्माणपछि तुरन्तै ढलको निर्माण कार्यपनि सुरु गर्ने परियोजनाले जनाएको छ । उपमहानगरपालिकाको ८२ किलोमिटर क्ष्ँेत्रफलमा ढल र नालाको निर्माण हुने छ । ढलबाट निस्कने फोहोरपानीको प्रशोधन केन्द्र समेत निर्माण भईरहेको छ ।
नगरभरीका ढल प्रशोधन केन्द्रमा लगेर मिसाउने र त्यसलाई प्रशोधन गरेर मात्रै नदिमा छोडिने छ । यो परियोजना सन् २०१६ सम्म पुरा भईसक्दा नगरबाट दैनिक निस्कने ७.४ मिलियन लिटर फोहोर पानीको उचित व्यवस्थापन हुने उपमहानगरपालिकाको विश्वास छ ।
