एकीकृत माओवादीका उपाध्यक्ष नारायणकाजी श्रेष्ठ प्रकाशले एमाले अध्यक्ष केपी शर्मा ओलीको ‘मानसिक स्वास्थ्य’ जाँच गर्न आग्रह गर्ने १९ दलीय मोर्चाको निर्णय प्रति असहमति जनाउँनुभएको छ । राजधानीमा आज पत्रकारसँग कुरा गर्दै उहाँले १० अर्ब दिए १९ दलले आन्दोलन गर्दैन भन्ने ओलीको अभिव्यक्ति र मोर्चाको निर्णय दुवै अराजनीतिक भएको बताउँनुभयो ।
प्रचण्ड नेतृत्वको १९ दलको हिजो बसेको बैठकले ओलीको आरोपको खण्डन गर्दै उहाँ मानसिक रुपमा समेत असन्तुलित भएको आशंका गर्दै उपचारको व्यवस्था गर्न सरकारलाई आग्रह गरेको थियो । उहाँले आन्दोलनकारीलाई सम्बोधन गरेर सहमतिका आधारमा संविधान गर्ने सम्भावना अझै रहेको बताउँनुभएको छ । प्रश्नावली निर्माण प्रक्रिया रोकेर विगतका सहमति र सम्झौता अनुसार अघि बढ्ने प्रतिवद्धता जनाए वार्ता हुने उहाँको भनाइ थियो ।
