२०७१ सालमा मोरङमा दुर्घटनामा परी ९७ जनाको मृत्यु भएको जिल्ला ट्राफिक प्रहरी कार्यालय मोरङले जनाएको छ । २०७१ सालमा मोरङ जिल्लामा भएका ३ सय ९१ वटा सवारी दुर्घटनामा ९७ जनाको मृत्यु भएको हो । यस्तै ०७१ सालमा विभिन्न सवारी साधनलाई कारबाही गरी १ करोड ८६ लाख ७१ हजार ८ सय रुपैयाँ राजस्व उठाएको कार्यालयले जनाएको छ । जसमा २९ हजार ३ सय २२ वटा मोटरसाइकलाई कारबाही गरिएको जिल्ला ट्राफिक प्रहरी कार्यालय मोरङले जनाएको छ । यस्तै १० हजार ५ सय ७ ट्रक, ५ हजार ४ सय ७३ बस, ४ हजार ७ सय ९८ कार–जिप, भ्यान, ६ हजार १ सय ७ ट्रयाक्टर र १ हजार १ सय ६३ वटा ट्याम्पोलाई कारबाही गरिएको छ । साँघुरो सडक र चालकको लापरबाहीका कारण सवारी दुर्घटना बढेको जिल्ला ट्राफिक प्रहरी कार्यालय विराटनगरका प्रहरी निरीक्षक विजय श्रेष्ठले जानकारी दिनुभयो । “मुख्य त चालकको लापरबाहीकै कारण दुर्घटना भएको पाइन्छ,” श्रेष्ठले भन्नुभयो, “त्यसपछि साँघुरो सडकले पनि दुर्घटना बढेको हो ।”
