विश्व खाद्य कार्यक्रमले गोरखाको लाप्राकका भूकम्प पीडितलाई बाँडेको कुहिएको चामलका कारण त्यहाँ महामारी फैलने सम्भावना बढेको छ । चामलको अवस्थाबारे बुझ्न पुगेको राष्ट्रिय विपद व्यवस्थापन अनुगमन तथा निर्देशन विशेष समितिले एक दुई दिनभित्र कुहिएको चामलका कारण त्यहाँ महामारी फैलन सक्ने आशंका गरेको हो ।
त्रिपालभित्र भण्डारण गरेर राखिएको चामलमा झिंगा भन्किरहेको र निकै परसम्म दुर्गन्ध फैलिएको सभासद उषा गुरुङले बताउनुभयो । भूकम्प पीडितलाई बाँड्नका लागि त्यहाँ पु¥याइएको ४ सय ५७ बोरा चामलमध्ये १ सय २० बोरा चामल पूर्ण रुपमा कुहिएको पाइएको उहाँको भनाई छ । राम्रो चामल भने सर्वदलीय सहमतिमा स्थानीयलाई वितरण गरिएको छ । खाद्य प्रविधि तथा गुण नियन्त्रण र वाणिज्य विभागका प्रतिनिधिहरुले चामलको नमुनाको वैज्ञानिक परीक्षणपछि प्रतिवेदन तयार गरिनेछ ।
लाप्राकमा कुहिएको चामल बाँडिएको समाचार सार्वजनिक भएपछि राष्ट्रिय विपद व्यवस्थापन अनुगमन तथा निर्देशन विशेष समिति अन्तर्गत सभासद भानुभक्त ढकाल नेतृत्वको टोली लाप्राक पुगेको हो । आज गोरखाको मझुवा देउरालीस्थित विश्व खाद्य कार्यक्रमले चामल भण्डारण गरेको ठाउँको अध्ययन गरी सदरमुकाममा सर्वपक्षीय छलफल गर्ने सभासद गुरुङले बताउनुभयो । लाप्राकका बासिन्दाले भने फेरि सहयोग नपाउने हो कि भनेर यसलाई साम्य बनाउन समेत आग्रह गरेका छन् ।
