झापा, ३ मङ्सिर ।
झापाको पूर्ण टुङ्ग विर्ता सिटी हस्पिटलले लोकतन्त्र प्राप्तिका लागि लामो समय जेलनेल व्यहोरेका दुईजना राजनीतिक योद्धालाई आजीवन निःशुल्क उपचार सेवा दिने निर्णय गरेको छ ।
त्यस्तो उपचार सेवा पाउनेमा दुर्गा अधिकारी ‘सानो’ र पूर्णानन्द शर्मा छन् । दुबैलाई आज अस्पतालले स्वास्थ्य परीक्षण गरेर सेवाको सुरुवात गरेको अस्पतालका अध्यक्ष गोपालकुमार बस्नेतले जानकारी दिए ।
दुर्गा झापाली बाम आन्दोलनका पुराना योद्धा हुन् । उनले ‘झापा विद्रोह’ गरेको अभियोगमा हालका प्रधानमन्त्री केपी ओलीसँगै १७ वर्ष जेल लामो जीवन बिताएका थिए ।
पूर्णानन्द नेपाली प्रजातान्त्रिक आन्दोलनका अगुवा नेता हुन् । उनले पनि ३ वर्ष निर्वासन र ५ वर्ष जेल जीवन बिताएका थिए ।
नेपालमा नयाँ संविधान जारी भएको खुसियालीमा अस्पतालले सामाजिक उत्तरदायित्वअन्तर्गत देश र जनताको सेवामा जीवन समर्पित गरेका दुई अग्रज लोकतान्त्रिक योद्धालाई सम्मानस्वरुप निःशुल्क आजीवन उपचार सेवा दिने निर्णय गरेको अस्पतालका निर्देशक आनन्द बस्नेतले बताए ।
