विराटनगर पुस २६
बिराटनगर बसपार्क क्षेत्रमा हुने अवैध गतिविधि र सम्भावित अपराध रोक्न सादा पोसाकमा खटिने घुमुवा प्रहरी शनिबार विराटनगर बसपार्कमा कुटिएका छन् । एकजना अपरिचित व्यक्तिसँगको वादविवाद मिलाउने क्रममा लामो कपाल पालेका ती युवकले निलो ज्याकेट लगाएका घुमुवा प्रहरीलाई हात लगाए । युवक र एकजना वृद्धबीचको विवाद मिलाउने प्रयास गर्दा ती वृद्धले पनि नचिनेरै प्रहरीलाई हातपात गरे । त्यसपछि आक्रोसित बनेका प्रहरीले युवकलाई लछार पछार गर्दै कुटपिट गर्न थाले । युवकले पछि ती व्यक्ति प्रहरी भएको थाहा पाएपछि भागेका थिए । वृद्धको आँखीभुईं छेउबाट चोट लागेको थियो । मादक पदार्थ सेवन गरेका ती व्यक्ति बसपार्क क्षेत्रमा घुमिरहने मानिस भएको स्थानीयले बताए । घुमुवा प्रहरीले केहीक्षणमै प्रहरीको गाडीलाई खबर गरेपछि प्रहरीको भेन आइपुग्यो । वृद्ध भने कान समाएर उठबस गर्दै माफी दिन आग्रह गरिरहेका थिए । घटनामा संलग्नको विषयमा जानकारी लिन प्रहरीले वृद्धलाई पक्राउ गरेको छ ।
