मोरङको रंगेलीमा गत साता प्रहरीको गोली लागेर ज्यान गुमाएकाहरुको आज शवयात्रा निकालिएको छ । शवयात्रामा मधेसी मोर्चाका कार्यकर्ता सयौंको संख्याका सहभागी थिए ।कोशी अञ्चल अस्पतालबाट शवयात्रा निकाल्नुअघि मधेसी नेताहरु उपेन्द्र यादव, राजेन्द्र महतो, जेपी गुप्ता, अनिल झालगायतले मृतकहरुप्रति श्रद्धान्जलि दिएका थिए । शवयात्राले विराटनगरका विभिन्न भागको परिक्रमा गरी कटहरी हुँदै रंगेली पुगेको थियो । रंगेलीबाट डायनिया हुँदै स्थानीय खोलामा मृतकको सामूहिक संस्कार गरियो । गत विहीबार भएको गोलीकान्डमा रंगेलीकी ५८ वर्षीया द्रोपतिदेवी चौधरी, बरडंगा–२ का ४५ वर्षीय महादेव ऋषिदेव र डायनिया–९ का २५ वर्षीय शिवु माझीको मृत्यु भएको थियो ।
