विराटनगर फाल्गुन १३
आगामी फागुन २१ देखि २३ गतेसम्म जिल्ला जनस्वास्थ्य कार्यालय मोरङले हात्तीपाइले रोग विरुद्धको औषधि खुवाउने तयारी गरेको छ । हात्तीपाइले रोग विरुद्धको औषधी खुवाउन आवश्यक तयारी भइरहेको विराटनगरमा भएको सरकारी कार्यालय प्रमुखहरुसगको अभिमुखीकरणमा जानकारी दिइएको हो । गत बर्ष ८ लाख ४० हजार २ सय जनालाई हात्तीपाइले रोग विरुद्धको औषधी खुवाउने लक्ष्य राखिएकोमा ५ लाख ७२ हजारलाई खुवाईएको कार्यालयले जनाएको छ । यस वर्ष पनि ८ लाख २५ हजारलाई औषधी खुवाउने लक्ष्य राखिएको जनस्वास्थ्य कार्यालय मोरङका प्रमुख भानु याङ्देनले जानकारी दिनुभयो । सरकारले देशलाई सन् २०२० सम्ममा हात्तीपाइले रोग निवारण गर्ने लक्ष्य लिएको छ ।
