विराटनगर फाल्गुन २४ , बिराटनगरका विभिन्न औषधि पसल सहित निजी नर्सिङ होमहरुमा औषधि व्यवस्था विभागले छापा मारेको छ । अनुगमन गर्दा त्यहाँ म्याद गुज्रिएका औषधि बिक्री हुने गरेको पाइएको छ । विराटनगरको रोडशेषदेखि सुरु गरिएको अनुगमनले नगरका लगभग एक दर्जन औषधि पसल र निजी क्लिनिकहरुको अनुगमन गरेको थियो । विराटनगरको सप्तकोशी नर्सिङ होमामा म्याद गुज्रिएका विभिन्न एघार प्रकारका औषधि बिक्री गर्ने गरेको खुलेको छ । जयनारायण यादवले विराटनगर–१६ मा संचालित नामबिनाको औषधि पसल बन्द गरेर संचालक भागेको अनुगमन टोलीले जनाएको छ । यस्तै यादवले नै संचालन गरेको ल्याब फोहोर पाइएको थियो । मिति सकिएका औषधिहरु सप्तकोशी नर्सिङ होमको इमर्जेन्सी कक्षको दराज भित्र पाइएको थियो । अनुगमनमा औषधि व्यवस्था विभागका प्रमुख गणेश तामाङ, वाणिज्य, आपूर्ति तथा सामान्य प्रसासन मन्त्रालयको निर्देशनमा काठमाण्डौवाट आएको टोली लगायतको सहभागिता थियो ।
