बिनु तिम्सिना
बिराटनगर चैत्र २३,
मोरङको मझारे गाविसस्थित लोहन्द्रा खोलामा सात करोडको लगानीमा पुल निर्माणको कार्य भइरहेको छ । पुल नहँुदा लामो समयदेखि समस्या झेल्दै आएका यहाँका बासिन्दा पुल निर्माण हुने भएपछि हर्षित बनेका छन् ।
मोरङको मझारे गाविसस्थित लोहन्द्रा खोलामा पक्की पुल निर्माण हुने भएपछि यो क्षेत्रका आधा दर्जनभन्दा बढी गाविसका स्थानीय तथा कृषकहरु हर्षित बनेका छन् । खोलामा पक्की पुल नहुँदा स्थानीयले निकै सास्ती व्यहोर्नुपरेको थियो । वर्षामा उनीहरु २७ किलोमिटर भारतीय भूमिको घुमाउरो सडक प्रयोग गरेर विराटनगर आउन बाध्य थिए । हिउँदमा बाँसको कच्ची पुल बनाएर खोला तर्ने गरेको भएपनि बर्खामा थप समस्या हुने गरेको स्थानीय शम्भु मण्डलको भनाइ छ ।
पक्की पुल नहँुदा आफूहरुले उत्पादन गरेका कृषि उपजसमेत बजारसम्म ल्याउन नसकेको कृषकहरुको गुनासो छ । लामो समयपछि पक्की पुल निर्माण हुने भएपछि कृषकहरुसमेत हर्षित बनेका छन् । पुलले एकै गाविसका बासिन्दाबीचको सम्बन्ध टाढा भएको र दैनिक जीवनयापनमा समेत समस्या भएका कारण पुल आवश्यक भएको सांसद अमृत अर्यालले बताउनुहुन्छ । संविधानसभाको विर्नाचन अघि नै पुल निर्माण गर्ने आश्वासन दिनुभएका अर्यालकै पहलमा यस खोलामा हाल धमाधम पुल निर्माणको कार्य भइरहेको छ । आगामि दिनमा पनि यस क्षेत्रको उन्नती र प्रगतिका लागि आफू लागिपर्ने उहाँ बताउनुहुन्छ । पूर्ण रुपमा नेपाल सरकारको लगानी रहेको यो पुलले मझारे गाविसको बार्ड नम्बर ८ र ९ जोड्नेछ । साथै पुलले मझारे गाविसका साथसाथै बुधनगर, भाथिगछ, सिसवनीजहदा, पोखरिया, नोचा, कटारीलगायतका आधा दर्जनभन्दा बढी गाविसका एक लाख बढी स्थानीय लाभान्वित हुने छन् । जिल्ला प्राविधिक कार्यालयका प्रमुुख इन्जिनियर समरबहादुर खनालले कुल ७ करोड २० लाखको लगानीमा २०७४ साल माघ महिनाभित्र पुल निर्माण सम्पन्न गर्नेगरी निर्माण कम्पनीसँग सम्झौता भइसकेको जानकारी दिनुभयो । ६१ दशमलव ५ मिटर लम्बाइ र पाँच दशमलव ४५ मिटर चौडाइ भएको पुल निर्माण गरिने उहाँले जानकारी दिनुभयो । खोलाले धार परिवर्तन गरेपछि वर्षौंदेखि पीडामा रहेका जनतालाई पुल बनेपछि राहत मिल्नेछ । खोलामा पुल निर्माण भएपछि खोला वारि–पारि गर्न नाउँ प्रयोग गर्नुपर्ने स्थानीयको झन्झटसमेत अन्त्य हुनेछ । पुलको शिलान्यास भएर मात्रै हुँदैन, समयमै सम्पन्न गर्नका लागि स्थानीयबासीको समेत सहयोग आवश्यक रहेको छ
