काठमाडौं- प्रधानमन्त्री केपी ओलीले ठाडो आदेश दिएर नयाँ स्वास्थ्य सचिवमा डा. सेनेन्द्रराज उप्रेतीलाई नियुक्त गरेका छन्। नेकपा माओवादी केन्›ले समर्थन फिर्ता लिई सत्ताबाट बाहिरिएपछि अल्पमतमा परेको प्रधानमन्त्री केपी ओली सरकारले व्यवस्थापिका संसद्का प्रमुख दुई दलको आग्रहविपरीत नयाँ स्वास्थ्य सचिव नियुक्त गरेको हो।
शुक्रबार बसेको मन्त्रिपरिषद् बैठकले स्वास्थ्य सचिवमा डा. सेनेन्द्रराज उप्रेतीलाई नियुक्त गर्नेबारे छलफल भए पनि निर्णय भने भएको थिएन। प्रधानमन्त्री तथा मन्त्रिपरिषद् कार्यालयबाट डा. उप्रेतीले नियुक्तिपत्र बुझेपछि अल्पमतमा परेको सरकारको निर्णय सार्वजनिक भएको हो।
ओली सरकारप्रति विश्वास नरहेको भन्दै बुधबार नेपाली कांग्रेस र नेकपा माओवादी केन्›ले व्यवस्थापिका संसद्मा अविश्वास प्रस्ताव दर्ता गराएको छ। ओली नेतृत्वको सरकार अल्पमतमा परिसकेको जनाउँदै प्रमुख दुई दलले कामचलाउ सरकारले दीर्घकालीन असर पुग्नेखाले निर्णय नगर्न आग्रह गरेको थियो।
उक्त आग्रहलाई बेवास्ता गर्दै शुक्रबार बसेको मन्त्रिपरिषद्ले डा. उप्रेतीसँगै अन्य विभिन्न पदमा नियुक्ति, बढुवा तथा आर्थिक अनुदान दिने निर्णय गरेको छ। अल्पमतमा परेको र संसद्मा अविश्वास प्रस्ताव दर्ता भइसकेकाले कामचलाउ हैसियतमा पुगेको सरकारलाई दैनिक प्रशासन चलाउनेबाहेक सरुवा, बढुवा, आर्थिक सहायता बाँड्ने लगायत निर्णय गर्ने अधिकार हुँदैन।
तर, ओली सरकारले धमाधम नियुक्ति, बढुवा तथा आर्थिक सहायताका निर्णय गरेको छ। मन्त्रिपरिषद्मा भएका निर्णयसमेत गोप्य राख्दै गएको छ। स्रोतका अनुसार मधेसी मोर्चा र संघीय गठबन्धनले समेत माओवादी र कांग्रेसले दर्ता गरेको अविश्वास प्रस्तावमा समर्थन व्यक्त गर्ने भएपछि प्रधानमन्त्री ओलीको ठाडो हस्तक्षेपमा सबै निर्णय भएको हो।
