बिराटनगर मङ्सिर ६, धेरै पटक मिति घोषणा भएपनि संचालन हुन नसकेको सातौं राष्ट्रिय खेलकुद प्रतियोगिता यहीँ पुस ८ गतेदेखि संचालन हुने भएको छ । राष्ट्रिय खेलकुद परिषदको काठमाडौमा सोमबार बसेको बैठकले सो निर्णय गरेको हो । प्रतियोगितामा ३० वटा खेल खेलाइने साथै खेलहरु विराटनगर , सिरहा , झापा, सुनसरीमा हुने छन् । त्यसैगरी राष्ट्रिय खेलकुदमा खेलाडी छनौटका लागि यहीँ मङ्सिर २० गतेदेखि पुस १ गतेसम्म देशका विभिन्न जिल्लामा खेलकुद प्रतियोगिता गरिनेछ । सातौं राष्ट्रिय खेलकुद प्रतियोगितामा ८ हजार तीन सय खेलाडीले प्रतिस्पर्धा गर्नेछन् । पुर्वाञ्चलको खेल क्षेत्रको लागि यो प्रतियोगिता निकै ठुलो अवसरको रुपमा रहेको छ ।
