बिराटनगर पुस २१ , नेपाली क्रिकेटमा सबभन्दा ठूलो पुरस्कारको प्रतियोगिता ‘सगरमाथा सिमेन्ट धनगढी प्रिमियर लिग–डीपीएल’ खेल्ने ६ सहरका ६ टिम बिहीबार घोषणा गरिएको छ । इन्डियन प्रिमियर लिग शैलीको फ्रेन्चाइज टिमको रुपमा विराटनगर, काठमाडौं, रुपन्देही, धनगढी, अत्तरिया र कन्चनपुरले प्रतिस्पर्धा गर्ने भएका छन् ।
धनगढी क्रिकेट एकेडेमी (डीसीए) र सुदूरपश्चिमाञ्चल एकेडेमी (एसपीए) को संयुक्त आयोजनामा चैत ५ देखि १९ सम्म हुने धनगढी प्रिमियर लिगमा टिम मालिक र कप्तान पनि घोषणा गरिएको छ । कुल २८ लाख ५० हजार पुरस्कार प्रतियोगितामा स्थानीय क्लब, व्यवसायिक समूह र क्रिकेटप्रेमीहरुको स्वामित्वमा फ्रेन्चाइज टिम बनाइएको हो । प्रतियोगिताका लागि सीबाईसी अत्तरियाको (कप्तान ज्ञानेन्द्र मल्ल), बिराटनगर किङ्सको (कप्तान शरद भेषावकर), काठमाडौं गोल्डेन्सको (कप्तान बसन्त रेग्मी), रुपन्देही च्यालेन्जर्सको (कप्तान शक्ति गौचन), कञ्चनपुर आइकोनिकको (कप्तान विनोद भण्डारी) र टिम चौराहा धनगढीको (कप्तान पारस खड्का) गरी छ टिम छनोट गरिएको आयोजकले जनाएको छ | समान १ लाख ५० हजार पारिश्रमिक पाउने कप्तान लक्की ड्रबाट छनोट गरिएको हो |
खेल अन्चल प्रहरी कार्यालयको धनगढीस्थित मैदानमा सञ्चालन गर्ने बताइएको छ । प्रतियोगितामा १९ खेल हुनेछन् ।
