स्थानीय तहको निर्वाचनलाई व्यवस्थित बनाउन गृहमन्त्रालयले म्यादी प्रहरी भर्नासम्बन्धी सूचना जारी गरेपछि अहिले तोकिएको स्थानमा म्यादी प्रहरीमा भर्ती हुन चाहनेहरुको भीड लाग्ने गरेको छ ।
सरकारले म्यादी प्रहरी भर्नासम्बन्धी निवेदन गत ११ गतेदेखि संकलन सुरु गरेपछि अहिले विराटनगरस्थित जिल्ला प्रहरी कार्यालयमा भर्ती हुन इच्छुकहरुको भीड लागेको छ । नेपाल सरकार गृह मन्त्रालय प्रहरी प्रधान कार्यालयद्वारा जारी गरिएको सूचनामा आगामी १७ गते अपरान्ह ५ बजेसम्म दर्खास्त लिने जनाइएको छ । आसन्न निर्वाचनलाई व्यवस्थित र शान्तिपूर्ण बनाउन आवश्यक थप जनशक्तिको रुपमा ७५ हजार म्यादी प्रहरी माग गरिएको छ ।
म्यादी प्रहरी भर्नाका लागि १८ वर्षदेखि ५४ वर्षसम्म उमेर हद तोकिएको छ । म्यादी प्रहरीको छनौट चैत १९ गतेदेखि गरिने र अन्तिम नतिजा २१ गते प्रकाशन गरिने जनाइएको छ । ५५ कार्य दिनका लागि नियुक्त गरिने म्यादी प्रहरीले नेपाल प्रहरीको प्रहरी जवानले पाए सरहको तलब, भत्ता र तोकिएअनुसारका अन्य सुबिधा पाउने जनाइएको छ ।
