पहिलोपटक अन्तर्राष्ट्रिय पदक जित्ने नेपाली पुरुष भलिबल टोलीलाई सरकारले पुरस्कृत गर्ने भएको छ ।
टोलीका सदस्यलाई सरकारले जनही १ लाख रुपैयाँ दिने भएको छ । टोलीको स्वागतमा गएराति त्रिभुवन विमानस्थल पुग्नुभएका युवा तथा खेलकुद मन्त्री दलजित श्रीपालीले पुरस्कार दिने घोषणा गर्नुभएको हो । टोलीलाई विमानस्थलमा भव्य स्वागत गरिएको थियो । स्वागतका लागि मन्त्री श्रीपालीसहित, नेपाल भलिबल संघका पदाधिकारी, खेलाडी, भलिबल क्लबका पदाधिकारीको उपस्थिति थियो ।
माल्दिभ्समा बिहीबार सम्पन्न प्रतियोगितामा नेपालले कास्य पदक जितेको थियो । कीर्गिस्तान विजेता बनेको च्याम्पियनसिपमा तुर्कमिन्स्तान रजत पदक जितेको थियो । लिग चरणमा माल्दिभ्सलाई हराएपछि नेपालको पहिलो अन्तर्राष्ट्रिय पदक पक्का भएको थियो । ४१ वर्षअघिबाट अन्तर्राष्ट्रिय भलिबलमा भाग लिन थालेको नेपाली पुरुष टोलीले पदक जितेको यो पहिलो पटक हो ।
