काठमाडौं, जेठ १८ । काठमाडौंलाई सफासुग्घर बनाउन ‘सफा सहर’ अभियान थालिएको छ ।
महानगरपालिकाका नवनिर्वाचित नगरप्रमुख विद्यासुन्दर शाक्य र उपप्रमुख हरिप्रभा खड्गीले बिहीबारदेखि ‘सफा सहर’ अभियान सुरु गरेका हुन् ।
बुधबार पद तथा गोपनीयताको शपथग्रहण गरेका प्रमुख शाक्य र उपप्रमुख खड्गीले बिहीबार बूढानीलकन्ठ नगरपालिका र काठमाडौं महानगरपालिकाको सिमानामा रहेको बाँसबारीमा उक्त अभियानको सुरुआत गरेका हुन् ।
‘काठमाडौंलाई सफा बनाउने अठोटका साथ अभियान सुरु गरिएको हो, देखाउनका लागिमात्र होइन’–नगरप्रमुख शाक्यले भने ।
सोही अवसरमा उपप्रमुख खड्गीले सहर सफा गर्ने कामका लागिमात्र नभइ महानगरका सम्पूर्ण कार्य गर्न नगरवासीको सहयोगको आवश्यक रहेको बताइन् ।
उक्त कार्यक्रममा स्थानीय बासिन्दा, सामाजिक संघ–संस्थाका प्रतिनिधि, काठमाडौं महानगरका कर्मचारीलगायतको सहभागिता रहेको थियो । रासस
