वीरगन्जमा राष्ट्रिय जनता पार्टीले आह्वान गरेको बन्दको अवज्ञा गर्दै बजार खुलेको छ । मंगलबारदेखि बन्द रहेको बजार शुक्रबारबाट खुल्न सुरु गरेको छ ।
सवारी साधन पनि संचालनमा आएपछि वीरगन्ज बजारमा चहलपहल बढेको छ । स्थानीय व्यापारीहरुले राष्ट्रिय जनता पार्टीले बन्द आह्वान गरेर आफूहरुलाई दुःख मात्रै दिएको गुनासो पनि गरेका छन् । उनीहरुले आन्दोलनको नाममा जनतालाई दुःख दिने काम कसैले पनि गर्न नहुने धारणा पनि राखेका छन् ।
बन्दको चौथो दिन शुक्रबार बिहान पानी परेका कारण वीरगन्जका सडकमा आन्दोलनकारीहरु देखा परेका थिएनन् । तर पानी पर्न रोकिए पछि घण्टाघर, नगवा, मालपोत चोक, पावरहाउसलगायतका केही स्थानमा राष्ट्रिय जनता पार्टीका कार्यकर्ताहरुले केहीबेर टायर बालेर प्रदर्शन गरेका थिए । राष्ट्रिय जनता पार्टीका नेता शिव पटेलले भने बन्द फिर्ता नभएको बताउँदै पानी परेकोले कार्यकर्ता सडकमा नदेखिनु स्वभाविक भएको बताए । आन्दोलनकै क्रममा प्रर्दशनकारीले दिउँसो २ बजे वीरगन्जमा लाठी जुलुस प्रदर्शन भने प्रर्दशन गरेका छन् ।
