सुमन तिमल्सिना । बिराटनगर, असार १६ – विहान ६ बजेदेखि स्थगित विराटनगर महानगरपालिकाको मत गणना शुरु भएको छ । दलबीचमा सहमति वडा नम्बर १ देखि ४ सम्मको वडाबाट मतगणना शुरु भएको क्षेत्रीय निर्वाचन अधिकारी प्रेमप्रसाद सञ्जेलले जानकारी दिनुभयो । ‘चार वटा वडाको मत गणनाको काम शुरु भएको छ’ उहाँले भन्नुभयो, ‘हिजोदेखि नै एक नम्बर वडाको मत गणना शुरु गरेको भएपनि आजदेखि ३ वडा थपेका छौ अब केही समय पछि ५ नम्बर वडा पनि थपेर काम शुरु हुने छ ।’
विराटनगर महानगरमा कुल मतदाता १ लाख १३ हजार ७६१ जना रहेकोमा ८० हजार ४ सय ७७ मत खसेको थियो । यो खसेको मतको आधारमा हेर्ने हो भने आज बिहान सम्म जम्मा ३ सय ५० मत मात्र गणना भएको छ । मत गणनामा ढिला भएपछि अहिले मत गणक बढाएर मत गणनालाई तिब्रता दिने तयारी भइरहेको मुख्य निर्वाचन अधिकृत विनोदकुमार पोखरेलले जानकारी दिनुभयो ।
