डोटी । भीमदत्त राजमार्ग अन्तरगत पर्ने डोटीको गोगनपानीमा बस दुर्घटना हुँदा दुई जनाको मृत्यु भएको छ । मंगलबार दिउँसो कञ्चनपुरको महेन्द्रनगरबाट बैतडी जाँदै गरेको र डडेल्धुराबाट महेन्द्रनगर फर्किदै गरेको बस एक आपसमा जुध्दा दुई जनाको मृत्यु भएको हो ।
महेन्द्रनगरबाट बैतडी जाँदै गरेको महाकाली यातायातको ना ५ ख ६०१ नम्बरको बस र डडेल्धुराबाट महेन्द्रनगर फर्किदै गरेको उग्रतारा यातायातको ना ४ ख ६८५६ नम्बरको बस गोगनपानीमा जुध्दा दुई यात्रुको मृत्यु भएको जिल्ला प्रहरी कार्यालय डोटीका प्रहरी उपरीक्षक मधु पुडासैनीले जानकारी दिए ।
उनका अनुसार दुर्घटनामा परि बैतडीको देहिमाण्डौं २ ८० वर्षीया द्रोपती भण्डारी र डडेल्धुराको परशुराम नगरपालिका ७ का १३ वर्षीय विक्रम बोहराको घटनास्थलमै मृत्यु भएको हो । दुर्घटनामा परि गम्भीर घाईते पाँच जनालाई उपचारको लागि कैलालीको धनगढी पठाइएको प्रहरी उपरीक्षक पुडासैनीले बताए ।
