जिल्ला प्रहरी कार्यालय झापाका अनुसार मतदानका दिन परिचालन गरिने सुरक्षा व्यवस्थाका लागि रणनीति बनाइसकिएको भएपनि त्यस अघि नै हुन थालेका बम विस्फोट लगायतका अवाञ्क्षित क्रियाकलापले सुरक्षा तैनाथी बढाइएको हो । केन्द्रीय सुरक्षा परिचालन नीति अनुसार झापामा २ हजार प्रहरी र २७५५ म्यादी प्रहरी गरी ४७५५ प्रहरी खटाइएको छ ।
जिल्लाको सुरक्षालाई मध्यनजर गर्दै अन्य जिल्लाहरुबाट समेत प्रहरी ल्याएर परिचालन गरिएको छ । त्यसका साथै निर्वाचन सुरक्षाका लागि सशस्त्र प्रहरी र नेपाली सेना पनि खटाइएको छ । विशेषगरी नेपाली सेनालाई रातको समयमा मुख्य बजार र राजमार्गमा गस्तीका लागि परिचालन गरिएको छ । त्यस्तै नेपाल प्रवेश गर्ने पूर्वी नाकामा पनि यस पटक विशेष सुरक्षा सतकर्ता अपनाइएको छ ।
झापामा २८३ मतदान स्थललाई सुरक्षाको दृष्टिकोले झापा प्रहरीले तीन चरणमा विभाजन गरिसकेको जिल्ला प्रहरी कार्यालय झापाका प्रहरी नायव उपरीक्षक जितेन्द्र बस्नेतले जानकारी दिनुभयो । उहाँका अनुसार झापामा ४९ वटा अतिसंवेदनशील, १०५ वटा संवेदनशील र १२९ वटा सामान्य गरी मतदान स्थलको विभाजन गरिएको छ ।
झापा क्षेत्र नम्बर ५ मा सबै भन्दा बढी १४ वटा अतिसंवेदनशील मतदान स्थल रहेको छ भने, क्षेत्र नम्बर ३ मा ११ वटा र बाँकी १, २ र ४ वटा क्षेत्रमा ८/८ वटा अतिसंवेदनशिल मतदानस्थल रहेको जनाइएको छ । पाँच निर्वाचन क्षेत्र रहेको झापामा आसन्न निर्वाचनबाट पाँचजना प्रतिनिधिसभा र १० प्रदेशसभाका प्रतिनिधि निवार्चित हुने र यसका लागि झापामा पाँच लाख ८५ हजार १६६ जनाले मतदान गर्नेछन् । निर्वाचनमा लगभग ५ हजार ५ सय कर्मचारी खटिने भएका छन् ।
