सशस्त्र प्रहरीले नै सुनसरीमा सशस्त्र प्रहरीले चुनावको लागि भन्दै भारतीय नम्बर प्लेटका गाडीहरुको प्रयोग बढाएको हो । सशस्त्र सीमा सुरक्षा कार्यालय सुनसरीका माताहतमा कति भारतीय नम्बर प्लेटको गाडी प्रयोग भएको छ भन्ने स्पष्ट तथ्यांक नभए पनि ६ वटा भारतीय नम्बरका गाडी उनीहरुले प्रयोग गरिरहेको देखिएको छ ।
सशस्त्र प्रहरी बल सुरक्षा बेसक्याम्प दुुहबीले बिआर ११ एच २८०३ को भारतीय नम्बर प्लेटको गाडी चलाएको फेला परेको छ । भारतीय गाडी प्रयोग गर्नुको कारण बुझ्ने क्रममा बेसक्याम्प इन्चार्ज प्रहरी नायव उपरीक्षक विश्वबन्धु खड्काले आफूलाई केही थाहा नभएको बताउनुभयो ।
‘जिल्ला सुरक्षा समितिले निर्णय गरेर संचालनमा ल्याएको हुनसक्छ, यस बारेमा एसपी साबसँग बुझ्नु न’ उहाँले आग्रह गर्नुभयो । सशस्त्र सीमा सुरक्षा कार्यालय सुनसरीका एसपी ऋषिदेव कार्कीले जानकारी लिँदा उहाँले २÷४ वटा गाडी प्रयोग भएको स्वीकार गर्नुभयो । तर उहाँले जिल्ला सुरक्षा समितिको निर्णय अनुसार आफूहरुले भारतीय नम्बरका सवारी साधन प्रयोग गरेको हो कि होइन खुलाउन चाहनुभएन । एसपी कार्कीले यो भन्दा बढी बोल्नै नमिल्ने प्रतिक्रिया दिनुभयो ।
भारतीय नम्बर प्लेटका सवारी साधन प्रयोग गरेर सशस्त्र प्रहरीले भारतीय क्षेत्रको सुरक्षा गर्दै छ कि नेपाली भूमिको सरक्षा गर्दैछ भन्ने बारेमा आम नगरिक अन्यौलमा रहेको बताउँछन् । भारतीय नम्बर प्लेटका गाडीहरु सस्तो भाडामा पाइने भएपछि सशस्त्र प्रहरीले यसरी भारतीय नम्बर प्लेटको गाडी प्रयोग बढाएको हो । तर यसरी सशस्त्र प्रहरी चढेका गाडीहरु पक्राउ परेका तथा नियन्त्रणमा लिएको हुनसक्ने अनुमान गरिएको छ ।
एक त चुनावको बेला, अर्को भारतीय नम्बर प्लेटका गाडी सुरक्षा निकायले चढ्नु लज्जाको बिषय भएको पूर्व सुरक्षा अधिकारीहरु बताउँछन् । राष्ट्रिय सुरक्षाको सवालमा संवेदनशील हुनु पर्ने सशस्त्रले प्रयोग गरेको गाडी कस्तो हो अनुसन्धान हुनु पर्ने सुरक्षाविदहरु बताउँछन् ।
