मदन भण्डारी फाउन्डेसनको सहयोगमा राष्ट्रिय जागृति क्लब इटहरीको आयोजनामा शनिबार भएको फाइनल खेलमा थ्रीस्टारले ३७औं मिनेटमा बुद्ध चेम्जोङको गोलबाट अग्रता लिएको थियो । विमल घर्तीमगरको पासमा चेम्जोङले गोल गरेका थिए ।
निकै प्रतिस्पर्धात्मक बनेको उक्त खेलमा त्यसपछि गोल हुन सकेन र थ्रीस्टारले उपाधिमाथि कब्जा जमायो । उपाधिसँगै थ्रीस्टारले रु १२ लाख हात पारेको छ ।
झन्डै दुई वर्षसम्म फुटबल खेलमैदानबाहिर रहेको थ्रीस्टारले आफ्नो क्लबको लोगोमा पहिलोपटक प्रदेश–१ को खेलकुद सिटीको घोषणाको पूर्वसन्ध्यामा आकर्षक इटहरी रंगशालामा भाग लिँदै यतिधेरै राशिको पुरस्कारमाथि बाजी मार्यो ।
सो क्लबबाट खेलिरहेका खेलाडीहरूले व्यक्तिगत आर्थिक लाभका नगद पुरस्कारहरूसमेत प्राप्त गरे ।
थ्रीस्टारका अनन्त तामाङले प्रतियोगिताको सर्वोत्कृष्ट खेलाडी घोषित हुँदै रु २५ हजार र ४२ इन्चको कलर टेलिभिजन प्राप्त गरेका छन् । सोही क्लबका प्रशिक्षक मेघराज केसीले उत्कृष्ट प्रशिक्षकको उपाधिसहित रु २० हजार प्राप्त गरे ।
यसैगरी, थ्रीस्टारकै गोलरक्षक एलेन न्यौपानेले उष्कृष्ट गोलरक्षकको उपाधिसहित रु २० हजार प्राप्त गरे भने अजय मार्टिनले उत्कृष्ट मिकफिल्डर घोषित हुँदै रु २० हजार प्राप्त गरेका छन् ।
उपविजेता मनाङले रु पाँच लाख हात पार्यो । सोही क्लबका तर्फबाट सुजल श्रेष्ठले सर्वाधिक गोलकर्ताको उपाधिसहित रु १५ हजार प्राप्त गरे । मिडफिल्डरतर्फ मनाङका हेमन गुरुङले रु २० हजार र राइजिङ प्लेयरतर्फ आयोजक क्लबका खेलाडी विजय राई घोषित हुँदै रु १० हजार प्राप्त गरे ।
विजेता तथा उपविजेता टोलीलाई राष्ट्रिय खेलकुद परिषद (राखेप)का सदस्यसचिव केशवकुमार विष्टले शिल्ड र उपाधि प्रदान गरे । रासस
