काठमाडौं । नेकपा माओवादी केन्द्रले संसदीय दलको नेतामा अध्यक्ष पुष्पकमल दाहाललाई चयन गरेको छ । आईतबार सिंहदरबारमा बसेको माओवादी केन्द्रको संसदीय दलको पहिलो बैठकले दलको नेतामा अध्यक्ष दाहाललाई चयन गरेको हो ।
बैठकमा पार्टी एकता लगायत समसामयिक राजनीतिक विषयमा पनि छलफल भएको प्रवक्ता पम्फा भुसालले जानकारी दिइन् ।
उनले पार्टी एकताका लागि केही सैद्धान्तिक र केही बैचारिक विषयको टुंगो लागेपछि मात्रै सरकारमा सहभागी हुनेबारे पनि बैठकमा छलफल भएको उनले जानकारी दिइन् ।
सरकारमा समर्थन जनाईसकेकाले पार्टी एकतामा बाँकी रहेका विषयको टुंगो लगाई राष्ट्रपति, उपराष्ट्रपति, मन्त्रीहरु लगायत पदबारे प्याकेजमा सहमति भएपछि मात्रै सरकारमा सहभागी हुने बताइन् ।
संसदीय दलको नेतामा चयन भएपछि बैठक स्थलबाट बाहिरिँदै गर्दा अध्यक्ष दाहालले छिटै पार्टी एकताको टुंगो लाग्ने बताए । “एकताको कुरा गर्न जाँदैछु,” उनले भने ।
