एक सय चार वर्षको जहानियाँ राणा शासन अन्त्य भई देशमा प्रजातन्त्र बहाली भएको दिन फागुन ७ । सोही दिनको स्मरण गर्दै आज देशभर विभिन्न कार्यक्रमका साथ ‘६८औँ प्रजातन्त्र दिवस’ मनाइँदैछ ।२००७ सालमा राजा त्रिभुवन र राजनीतिक दलहरूको संयुक्त प्रयासमा १ सय४ वर्षको जहाँनिया राणाशासनको अन्त्य गर्दै प्रजातन्त्र स्थापना गरिएको थियो । त्यस्तै, प्रजातन्त्र स्थापनाका लागि शहीदहरू शुक्रराज शास्त्री, दशरथ चन्द, धर्मभक्त माथेमा र गंगालाल श्रेष्ठले वि.सं. १९९७ माघमा दिएका बलिदान उल्लेखनीय छ ।
जनक्रान्तिको माध्यमबाट राणाको पारिवारिक शासन अन्त्य गरी देशमा प्रजातन्त्र घोषणा भएको यस दिनको गौरवलाई सम्मान गर्दै विभिन्न कार्यक्रमको आयोजना गरिएको छ । प्रजातन्त्र दिवसको अवसर पारेर टुँडिखेलमा विशेष समारोहको आयोजना गरिएको छ । प्रजातन्त्र दिवसको अवसरमा शुभकामना सन्देश दिनुहुँदै राष्ट्रपति विद्या देवी भण्डारीले जनताले गरेको आन्दोलनबाट प्राप्त गरेका उपलब्धीहरुको मूल्यांकन गर्दै त्यसबाट प्राप्त अनुभव तथा पाठबाट निर्देशिशत भएर सुशासन, शान्ति र सहमतिलाई आत्मसात् गरी अगाडि बढ्नु अहिलेको मुख्य जिम्मेवारी रहेको बताउनुभएको छ ।
उहाले हालै भएका विभिन्न चरणमा सम्पन्न निर्वाचन मार्फत प्राप्त जनादेश अनुरुप देशमा आर्थिक समृद्धि र सुशासन कायम गर्नु आवश्यकता रहको समेत औल्याउनुभयो । त्यसैगरि प्रधानमन्त्री केपी शर्मा ओलीले जनताले बलिदानका साथ ल्याएको प्रजातन्त्रलाई निर्वाचनसँगै थप मजबुत बनाएको जनाउँदै स्थिर राजनीतिले मुलुकमा समृद्धि र विकास ल्याउने धारणा व्यक्त गर्नुभयो ।
त्यसैगरि काँग्रेस सभापति शेरबहादुर देउवाले लोकतान्त्रिक गणतन्त्र नेपालको संविधानलाई कृयाशील र संस्थागत गर्न सकेमात्र प्रजातान्त्रिक आन्दोलनमा बलिदानी दिएका शहीदको सम्मान हुन सक्ने धारणा समेत व्यक्त गर्नुभयो ।
