सिण्डिकेटको पक्षमा देखिएका यातायात व्यवसायीको बन्दका कारण जनजीवन कष्टकर बनेको छ । आज विहान काठमाडौं लगायत देशका विभिन्न भाग न्युन मात्रामा सार्वजनिक सवारी साधन सञ्चालन भएको छ ।
काठमाडौंमा बिहानै भाडाका सवारी साधनहरु नचले पनि निजी सवारी साधन र भाडाका ट्याक्सीहरु चलिरहेका छन् । साझा, मयुर लगायतका सवारी साधन भने विहानै देखि सञ्चालनमा रहेका छन् । सडक र बसपार्कसमेत सुनसान देखिएका छन् । यातायात व्यवसायीको हड्तालको प्रभाव काठमाडौं उपत्यका बाहिर बढी देखिएको छ ।
बस व्यवसायीले सेवा ठप्प पारेर हड्तालमा उत्रेपछि उपत्यका बाहिर सर्वसाधारण यात्रु अलपत्रमा परेका छन् । यातायात व्यवसायलाई कम्पनीमा दर्ता गरेर संचालन गर्नुपर्ने सरकारको निर्णयविरुद्ध व्यवसायीहरुले आजदेखि २७ गतेसम्म सेवा बन्द गरेर हड्तालसम्म गर्ने चरणवद्ध आन्दोलनका कार्यक्रम सार्वजनिक गरेका थिए ।
सरकारले यातायात व्यवसायीसँग घुँडा नटेक्ने बताउँदै आएको छ भने व्यवसायीहरु सरकारलाई घुँडा टेकाएरै छाड्ने बताउँदै आएका छन् । सरकारले भने सेवा अवरुद्ध गर्ने सवारीसाधनको रुट परमिट नै खारेज गरिदिने चेतावनी दिइसकेको छ । अघिल्लो सातामात्रै मन्त्रिपरिषदले सार्जजनिक यातायातलाई अत्यावश्यक सेवा अन्तरगत राख्दै यातायात बन्द गर्न नपाइने निर्णय गरेको थियो । तर, यातायात व्यवसायीले सरकारलाई चुनौती दिँदै बन्दको आयोजना गरेका हुन् ।(न्युज २४ बाट)
