धनकुटा, जेठ १४ । धनकुटाको चौविसे गाउँपालिकाले सुलभ फार्मेसी पसल सञ्चालनमा ल्याएको छ ।
सरकारले निःशुल्क वितरण गर्ने ३५ प्रकारका औषधिवाहेकका औषधि स्थानीयवासीलाई सहुलियत र सहज रुपमा उपलब्ध गराउने उद्देश्यले सुलभ फार्मेसी सञ्चालनमा ल्याइएको हो । चौविसे गाउँपालिकाभित्र ७ वटा स्वास्थ्य चौकी र ३ वटा सामुदायिक स्वास्थ्य संस्थामा सुलभ फार्मेसी सञ्चालनमा छन् ।
हाल स्थानीय स्वास्थ्य संस्थाबाटै १५० प्रकारका औषधि उपलब्ध हुन थालेको छ ।
फार्मेसी पसल सञ्चालनका लागि गाउँपालिकाले हरेक स्वास्थ्य संस्थालाई एक/एक लाख रुपैयाँ अनुदान उपलब्ध गराएको छ । सुलभ फार्मेसी पसलबाट निजी फार्मेसीले बिक्री गर्ने औषधिको मूल्यभन्दा ५ प्रतिशत सस्तोमा खरिद गर्न पाइने चौविसे गाउँपालिका स्वास्थ्य शाखाका प्रमुख खडानन्द शाहले जानकारी दिए ।
स्वास्थ्य चौकीभित्रै फार्मेसी सञ्चालनमा आएपछि औषधि खरिदका लागि टाढा जानुपर्ने बाध्यता अन्त्य भएको मुढेबास स्वास्थ्य चौकीका हेल्थ असिस्टेन्ट योगराज लिम्बुले जानकारी दिए ।
