प्रज्ञा तिमल्सिना:
काठमाडौं, असार ८ । उच्च शिक्षा पढ्न विदेश जाने विद्यार्थीको संख्या डरलाग्दो तवरले बढ्दै गएको छ ।
१७ बर्षदेखि २५ बर्ष उमेर समूहका युवा युवतीहरु वर्षैपिच्छे ठूलो संख्यामा उच्च शिक्षाका लागि भन्दै विदेश पुग्ने गरेका छन् ।
उनीहरुसंगै क्रिम जनशक्ति मात्रै बाहिरिएको छैन अर्बौं रुपैयाँ पनि रुपैयाँ पनि देशबाट बाहिरिने गरेको छ ।
प्लस टु सक्नासाथ विदेश जाने फेसन नै बनेको छ केही समय यता ।
उच्च शिक्षा हासिल गर्न होस वा पढ्ने वहानामा विदेश भासिने रहर, हरेक पढेलेखेका युवायुतीको सरोकारको विषय बनेको छ ।
प्लस टु सकेका अधिकांश बिद्यार्थीहरुलाई अब के गर्ने भन्यो भने रेडिमेड जवाफ हुन्छ, बिदेश जाने ।
०७४ साल बैसाखदेखी ७५ साल असार सम्मको तथ्याक हेर्ने हो भने ६९ हजार ६ सय २३ जना विद्यार्थीले शिक्षा मन्त्रालयबाट विदेश जाने अनुमती लिएका छन् ।
त्यसमध्ये आधा भन्दा बढीको गन्तब्य अष्टे«लिया हुने गरेको छ । एक वर्षमा अस्टे«लिया जान अनुमति लिनेहरुको संख्या ३७ हजार ५ सय ५५ जना रहेको छ ।
दोस्रो नम्वरमा भने जापान रहेको छ । जहाँ १२ हजार ५ सय ३२ विद्यार्थीले अनुमति लिएका छन् भने अमेरिका जाने विद्यार्थी सख्या भने २ हजार ७ सय ३६ रहेको छ ।
एक जना विद्यार्थीले बाहिर जाने प्रकृया मिलाउनेदेखी भिजा लगाउने समय सम्म १४ देखी २५ लाख रुपैयाँसम्म खर्च गर्नुपर्दछ ।
सरल तरिकाले हिसाब गर्दा पनि वार्षिक १ खर्व रुपैयाँ बढी नेपाली सम्पति बाहिर पुग्ने गर्दछ ।
विदेश जान चाहने विद्यार्थीहरुलाई नो अब्जेक्सन लेटर दिए वापत मात्रै शिक्षा मन्त्रालयले बार्षिक १४ करोड त राजश्व नै उठाउने गरेको छ ।
नेपाल सरकारले ७४ देशमा पढ्न जाने अनुमती दिएको छ ।
नेपाली विद्यार्थीहरुको अष्ट्रेलिया आकर्षणको केन्द्र बन्नुमा भिजा प्रक्रियामा सहजतादेखि कामको उपलब्धता पनि रहेको पाइएको छ ।
शिक्षा मन्त्रालयको वैदेशिक अध्ययन अनुमती शाखामा मात्र दिनह ३ सयको हाराहारीमा बाहिर जान अनुमती लिन विद्यार्थी आउने गरेका छन् ।
उच्च शिक्षाका लागी नेपालमा पनि राम्रा क्याम्पसहरु नभएको पनि होइन ।
तर विदेश मोहले फेशनकै रुप लिंदा विद्यार्थीहरु देशमा बस्नै नचाहने अवस्था विकसित बनेको छ ।
संगै पढेका साथिभाई एकपछि अर्को गरी विदेश पुगेपछि देशमै पढेर केही गर्छु भन्नेहरुको मन पनि उतै तानिनेमा शंका छैन ।
दक्ष युवा जनशक्ति र उनीहरुसंगै विदेशिने सम्पति बाहिरिनबाट रोक्न राज्यले तत्काल केही नगर्ने हो भने देशको भविष्य भयावह नहोला भन्न सकिदैन ।
