काठमाडौं, १८ असार । विश्वकप फुटबलको क्वाटरफाइनल प्रवेशका लागि आइतबार सम्पन्न रोमाञ्चक खेलमा स्पेनलाई हराउँदै आयोजक रसिया विजयी भएको छ । निर्धारित ९० मिनेटमा १–१ को बराबरी र अतिरिक्त ३० मिनेटको समयमा कुनै गोल हुन नसकेपछि पेनाल्टी सुटआउटमा पुगेको खेलमा स्पेन रसियासँग ४–३ ले पराजित भएको हो ।
जितसँगै आयोजक रसिया क्वाटरफाइनलमा प्रवेश गरेको छ भने पूर्वविजेतासमेत रहेको स्पेन नकआउट चरणबाटै घर फर्किन बाध्य भएको छ । मस्कोस्थित लुज्निकी रंगशालामा आइतबार राती सम्पन्न खेलको पहिलो पेनाल्टी स्पेनका खेलाडी आन्द्रेस इनिस्टाले हान्दै गोल गरे । त्यसपछि रसियाका फायोडोर स्मोलोभले पनि गोल गरे । त्यसपछि स्पेनाका गेरार्ड पिकेले गोल गर्दा रसियाका सेरागीले पनि जाली चुमाउन पुगे ।
त्यसपछि भने स्पेनका कोकीले पेनाल्टी मिस गर्दा रसिया ३–२ को अवस्थामा पुग्यो । कोकी पछि रसियाका एलेक्सेन्डरले गोल गरे । त्यसपछि पेनाल्टी प्रहार गर्न आएका स्पेनका सर्जियो रामोसले बललाई जाली चुमाउँदा रसियन खेलाडी डेनिसले पनि बललाई गोलको दिसा दिए ।
तर, स्पेनका लागो आस्पासले पेनाल्टी मिस गरेसँगै रसिया ४–३ ले विजयी बन्न पुग्यो । निकै रोमाञ्चक बनेको ९० मिनेट र त्यसपछिको अतिरिक्त समयको खेलमा रसियाले आत्मघाती गोल खाएको थियो भने पेनाल्टीमार्फत गोल फर्काउँदै बराबरी गरेको थियो ।
खेलको ११ औं मिनेटमा रसियाका डिफेन्डर सेरगेइले आत्मघाती गोल गरेपछि स्पेनले अग्रता बनाएको थियो । तर, स्पेनका गेरार्ड पिकेले पेनाल्टी एसियामा ह्याण्ड गरेपछि उनले एल्लो कार्ड पाए भने रसियाले पेनाल्टीको अवसर पायो । रसियाका अर्तेमले खेलको ४१ औं पेनाल्टीमार्फत गोल गर्दै बराबरी गरे । स्पेन विश्वकपबाट बाहिरिएसँगै खेलाडी मैदानमा निकै भाजुक देखिएका थिए ।
