काठमाडौं । भदौ १ गतेदेखि लागु हुने मुलुकी अपराधसंहिता ऐन–२०७४ ले अब सडकमा बसेर माग्न नपाइने व्यवस्था गरेको छ । ऐनमा अब कसैले कुनै सार्वजनिक स्थानमा भिक्षा माग्न वा बालबालिकालाई गीत गाउने, नाच्ने, खेल्ने वा कुनै काम गर्ने बहानामा वा अन्य व्यक्तिलाई कुनै प्रकारको रकम वा ज्याला दिई भिक्षा माग्न वा भिक्षा माग्न दुरुत्साहन दिनुहुँदैन भनिएको छ ।
पहिलोपटक भिक्षा मागेको भए एक महिनासम्म कैद वा एक हजार रूपैयाँसम्म जरिबाना र दोस्रोपटकदेखि प्रत्येकपटक दुईमहिनासम्म कैद वा दुईहजार रुपैयाँसम्म जरिबाना या पहिलोपटक भिक्षा माग्न लगाएको भए एक वर्षसम्म कैद वा दशहजार रुपैयाँसम्म जरिबाना वा दुवै र दोस्रोपटकदेखि प्रत्येकपटक तीनवर्षसम्म कैद वा तीसहजार रुपैयाँसम्म जरिबाना वा दुवैको व्यवस्था गरिएको छ ।
