झापा भदौ ५ , प्रहरीले झापामा आइतबारदेखि यौनजन्य हिंसा न्युनिकरणका लागि विशेष कार्यक्रम सुरु गरेको छ ।
१० दिनमा झापाको चन्द्रगढी नगरपालिकामा तीन जना बलात्कृत भएको घटना सार्वजनिक भएको थियो । केही दिनअघि मात्रै पनि पढ्न गइरहेकी बालिकालाई चियाबारीमा तीन जनाले रोकेर दुव्र्यवहार गरेका थिए ।
यौन अपराध नियन्त्रण गर्न प्रहरीले एक महिने विशेष अभियान थालेको हो । अभियानमा दुर्इ सय ३५ जना प्रहरी परिचालित छन् ।
अभियानका क्रममा यौनजन्य घटना र यसका कारक तत्वको खबर संकलन गरी विश्लेषण गरिने प्रहरीले जनाएको छ । झापाका डिएसपी जितेन्द्र बस्नेतले घटनाका दोषीलाई तत्काल पक्राउ गरी हदैसम्मको सजाय दिलाउन प्रभावकारी अनुसन्धान गरिने प्रतिबद्धता जनाएका छन् ।
‘यो अभियान प्रत्येक थाना र चौकीहरुले टोल–टोलमा गएर सञ्चालन गर्ने हो,’ डिएसपी बस्नेतले भने ।
एकमहिने अभियानका क्रममा सादा पोशाकमा मात्रै ५० जना प्रहरी परिचालित हुनेछन् । त्यस्तै ५० वटा मोटरसाइकलमा सयजना प्रहरी गस्तिमा निस्कनेछन् । तलाशी लिने टोली ७ वटा छ, जसमा ३५ जना प्रहरी छन् । ७ वटा पैदल गस्ती टोलीमा पनि ३५ जना प्रहरी छन् । अनुसन्धान टोली १५ जनाको छ ।
