सप्तरी १५ भदौ। उनको नाम हो दुखी राम । नाम त अभिभावकले राखेका होलान्, तर, अहिले भने आफ्नै कारण दुःख पाएका छन् ।
उनी २५ हजार धरौटी तिर्न नसक्दा जेलमा छन् । जिल्ला अदालत सप्तरीले उनीसँग २५ हजार रुपैयाँ धरौटी माग गर्ने कारण हो, उनले अर्काे विवाह गर्नू ।
दुखी रामको आर्थिक अवस्था कमजोर छ । तर, उनले गत ९ बैशाखमा कान्छी श्रीमती भित्र्याए । कञ्चनरुप नगरपालिका १० घोघनपुरका २५ बर्षीय राम र २३ वर्षीया ममताकुमारी उरावले शम्भुनाथ मन्दिरमा विहे गरेका थिए ।
दुखी रामका पहिलो पत्नी उर्मिलादेवीले अर्काे विवाह गरेको भन्दै प्रहरीमा उजुरी दिइन् । उर्मिलाको उजुरीका आधारमा प्रहरीले १८ साउनमा दुबैलाई पक्राउ गर्यो ।
अदालतले रामलाई २५ हजार र उरावलाई १५ हजार धरौटी बुझाउन भनेको छ । तर, दुबैसँग पैसा छैन । अदालतले तोकेको धरौटी नबुझाएका कारण दुबैलाई कारागार पठाइएको सप्तरी प्रहरीले जनाएको छ । (अनलाइन खबर)
