काठमाडौँ २४ भदौ । कञ्चनपुरकी १३ वर्षीया बालिका निर्मला पन्तको बलात्कारपछि हत्या गरेको अभियोगमा प्रहरीले पक्राउ गरेर सार्वजनिक गरेका दिलिपसिंह बिष्टको स्वास्थ्य परीक्षणको काम सकिएको छ ।
बिष्टलाई १० दिन काठमाडौँ राखेर उनको स्वास्थ्य परीक्षण सम्पन्न गरिएपनि अस्पतालले दिएको स्वास्थ्य परीक्षण रिर्पाेट भने सार्वजनिक गरिएको छैन । कञ्चनपुरका प्रहरी प्रमुख एसपी कुबेर कडायतले बिष्टको स्वास्थ्य परीक्षण रिपोर्ट प्राप्त भएको तर शिलबन्दी भएकोले आफूहरुले नखोलेको जानकारी दिए ।
उनले दिलिपको स्वास्थ्य परीक्षण रिर्पाेट प्रहरीले सोझै अदालतमा पेश गर्ने बताए । काठमाडौँमा स्वास्थ्य परीक्षण सकेर दिलिपलाई महेन्द्रनगर लगिएको छ । जिल्ला प्रहरी कार्यालय कञ्चनपुरले उनको मानसिक सन्तुलनको अवस्थाबारे परीक्षण गर्न काठमाडौँ ल्याएको थियो । दिलिपको मानसिक अवस्थासँगै यौन उत्तेजनाको पनि परीक्षण गरिएको छ ।
