धनकुटा, असोज ८ । धनकुटाको साँघुरीगढी गाउँपालिकाले स्थानको अभाव देखाउँदै खोलामै खेलमैदान निर्माण गरेको छ ।
गाउँपालिकाले वडा नम्बर ४ को फेदीस्थित लेउती खोलामा खेल मैदान निर्माण सुरु गरेको हो । गत आर्थिक वर्ष गाउँपालिकाले करिब तीन लाख रुपैयाँ छुट्याएर बगर सम्याउने काम गरेको छ ।
मैदानमा गिटी नै गिटी भएका कारण खेल्न सक्ने अवस्था भने छैन । वर्षामा आउने बाढीले जुनसुकै बेला पनि धार परिवर्तन गरी मैदानबाटै बग्न सक्ने अवस्था रहे पनि गाउँपालिकाले त्यसको परवाह नै नगरी मैदान निर्माण गरेको हो ।
सुरक्षित स्थानमा मैदान निर्माण गर्न स्थान अभाव भएकाले सोही स्थानमा खेलमैदान निर्माण गरिएको वडाध्यक्ष खड्ग लिम्बुले बताए ।
