काठमाडौं, ७ कात्तिक । चलचित्र ʻजय भोलेʼले आफ्नो लगानी सुरक्षित गरेको छ । दशैंको अवसर पारेर असोज ३० गते फूलपातिको दिनदेखि प्रदर्शनमा आएको चलचित्रले एक सातामा लगानी सुरक्षित गर्न सफल भएको निर्देशक अशोक शर्माले जानकारी दिए । १ करोड ३५ लाख रुपैयाँ लगानीमा बनेको चलचित्रले एक सातामा देशभरबाट ३ करोड २ लाख ७२ हजार २ सय ४९ रुपैयाँ ग्रस कलेक्सन गरेको निर्देशक शर्माले बताए । मित्रताको कथा वाचन गर्ने चलचित्रमा खगेन्द्र लामिछाने, सौगात मल्ल, स्वस्तिमा खड्का, बुद्धि तामाङ लगायतका कलाकारको अभिनय छ । मंगलवारबाट दोस्रो सातामा प्रवेश गरेको चलचित्र १ सय १५ पर्दामा प्रदर्शनरत छ ।
