मोरङ, ९ कात्तिक । मोरङको इलाका प्रहरी कार्यालय रानीको हिरासतबाट दुई अभियुक्त फरार भएका छन् ।
अपहरण गरी हत्या गरेको आरोपमा पक्राउ परेका विराटनगर महानगरपालिका १७ का मोहम्मद सदिफ हुसेन र मोहम्मद आरिफ फरार भएका हुन् । अभियुक्तद्वय गए राती थुनुवा कक्षको भेन्टिलेशनको रड काटेर फरार भएको मोरङ प्रहरीले जनाएको छ । असोज १ गते हराएका अस्फाकको असोज ७ गते विराटनगरको पैनीमा रहेको ह्युम पाइपभित्र शव भेटिएको थियो ।
अस्फाकको अपहरण गरी हत्या गरेको आरोपमा उनीहरु पक्राउ परेका थिए । हिरासतमा रहेका फरार भएपछि ड्युटीमा खटिएका प्रहरीलाई नियन्त्रणमा लिएर सोधपुछ गरेको मोरङका प्रहरी उपरीक्षक मनोज केसीले जानकारी दिनुभयो । भारतीय सीमाबाट १ किलोमिटर दुरीमा रहेको प्रहरी कार्यालयबाट यसअघि पनि थुनामा रहेका फरार भएका थिए ।(न्युज २४)
