विराटनगर, ३० कात्तिक।
एक नम्बर प्रदेशका प्रदेश प्रमुख गोविन्द तुम्बाहाङ्गले विराटनगरमा भइरहेका विकास निर्माणका विषयमा चासो देखाएका छन् । विहिवार विराटनगर महानगरका मेयर भीम पराजुलीलाई प्रदेश प्रमुखले आफ्नै कार्यालयमा बोलाएर विराटनगरको विकास र भइरहेका गतिविधिका विषयमा जानकारी लिएका हुन् ।
विराटनगर अस्थायी राजधानी र ऐतिहासिक शहर भएकाले विराटनगरमा के हुदै छ भनेर बुझ्न आफुले बुझ्न खोजेको मेयरसँग तुम्बाहाङले भनेका थिए । मेयर पराजुलीलाई भेटका क्रममा प्रदेश प्रमुख तुम्बाहाङ्गले भने, ‘विराटनगरलाई नमुना शहर बनाउनुहोस्, यसको मोडल १ नम्बर प्रदेशभरी लान सकियोस् ।’
मेयर पराजुलीले विराटनगर विकासको बाटोमा अगाडी बढी रहेको जानकारी गराएको उनको नीजी सचिवालयले जनाएको छ । विराटनगर महानगर भित्र भ्यू टावर, विराट राजाको दरवार ,४ सय किलोमिटर सडक पिच गर्ने काम, बैकल्पिक मार्गको विस्तार (घोगाह पैनी र ढाट देखि रानीसम्मको नहर छेउको बाटो) निर्माण ,बसपार्क निर्माण,स्वच्छ खानेपानीकालागि जाईका सँगको सहकार्य भईरहेको बारेमा मेयरले जानकारी गराएका थिए । मेयर पराजुलीले खेलकुद विकासका लागि खेलमैदान र फ्रडलाइट लगाउने र अन्य जनमैत्री कार्यक्रम अगाडी बढि रहेको जानकारी गराएका थिए । विकासका गतिविधिबारे सुन्दै प्रदेश प्रमुख तुम्बाहाङ्गले प्रदेश नं १ नमुना बन्ने आफ्नो अपेक्षा रहेको बताए ।
