बिराटनगर, मंसिर ०६ गते ।
१ नम्बर प्रदेश अन्तर्गत भोजपुर र धनकुटा जिल्लामा अन्दाजी ७ हजार ९ सय भन्दा बढी गाँजाको बोट फडानी गरी नष्ट गरिएको छ ।
बुधबार दिउँसो इलाका प्रहरी कार्यालय बोयाङबाट खटिएको प्रहरी टोलीले भोजपुर आमचोक गाउँपालिका-७ पटुके बस्ने चुडामणी रिजाल, बिशाल श्रेष्ठ, सिलाङे कान्छा श्रेष्ठ, कान्छा राई र मान बहादुर राईको जग्गामा प्राकृतिक रुपमा उम्रिएका अन्दाजी १ हजार १ सय ७० बोट अबैध लागूऔषध गाँजाको बोट फडानी गरी नष्ट गरिएको हो ।
त्यसैगरी भोजपुर हतुवागढी गाउँपालिका ४, ५, ६ र ९ नम्बर बस्ने जस बहादुर राई, मान बहादुर राई, नेपालमान राई, फुल कुमारी राईको जग्गामा अवैध रुपमा खेति गरिएको र माङटुङवा खकुवा खोलाको जंगलमा लगाईएको अन्दाजी १३ सय बोट गाँजा इलाका प्रहरी कार्यालय घोडेटार र प्रहरी चौकी हसनपुरवाट खटिएको प्रहरी टोलीले फडानी गरी नष्ट गरेको जिल्ला प्रहरी कार्यालय भोजपुरले जनाएको छ ।
साथै जिल्ला प्रहरी कार्यालय धनकुटा, इलाका प्रहरी कार्यालय छिन्ताङ र प्रहरी चौकी चानुवाबाट खटिएको प्रहरी टोलीले धनकुटा शहिदभूमि गाउँपालिका-७ गैरीगाँउ च्यामच्याम गाँउको भीर पाखामा, बिच जंगल, बारी लगायत महालक्ष्मी नगरपालिका-४ नाम्फुको भीर पाखामा उम्रिएका अन्दाजी ५ हजार ५ सय भन्दा बढी गाँजाको बोट फडानी गरी नष्ट गरिएको जिल्ला प्रहरी कार्यालय धनकुटाले जनाएको छ ।
