पशुपतिनगर मङ्सिर ९। पूर्वी इलामको पर्यटकीयस्थल पाथीभरा क्षेत्रमा बढ्दै गएको अतिक्रमण रोक्न व्यवस्थित पूर्वाधार निर्माणको पाँच वर्षे कार्यायोजना निर्माण गरिएको छ ।
वार्षिक रु तीन लाख बढी भक्तजन र पर्यटकले भ्रमण गर्दै आएको पाथीभरा क्षेत्रको पूर्वाधार निर्माणका लागि पाथीभरा क्षेत्र विकास कार्यक्रम स्वीकृत गरी उक्त कार्यायोजना निर्माण गरिएको हो । उक्त क्षेत्रभित्र अतिक्रमण भई अव्यवस्थित बस्ती विकास भएपछि त्यसलाई व्यवस्थित गर्न रु ३३ करोडको कार्यायोजना कार्यान्वयनमा ल्याइएको रोङ गाउँपालिकाका प्रमुख समसेर राईले बताए ।
भक्तजन र पर्यटकको आवागमन बढ्दै जाँदा पाथीभरा क्षेत्रको जङ्गल फडानी गरी होटल तथा लज खुल्ने क्रम बढेपछि व्यवस्थित विकास गरी अतिक्रमण रोक्न कार्ययोजना निर्माण गरिएको बताइएको छ । उक्त कार्यायोजनाअन्तर्गत मन्दिरको पुनःसंरचना गर्ने, पार्किङस्थल निर्माण गर्ने, अव्यवस्थित बसोवास हटाएर व्यवस्थित गर्ने, सडक निर्माण तथा खानेपानीको व्यवस्थित गर्ने गरी गुरुयोजना तयार गरिएको छ ।
उक्त क्षेत्रको गुरुयोजनाअन्तर्गत चालु आर्थिक वर्षदेखि नै काम शुरु गरिने गाउँपालिका प्रमुख राईले जानकारी दिए । रासस
