चिप्लेढुङ्गा, मङ्सिर १८ गते । पोखरा महानगरपालिकाले किशोरीको प्रजनन स्वास्थ्यलाई मध्यनजर गर्दै महानगरका शैक्षिक संस्थालाई सेनिटरी प्याडयुक्त बनाउने बताएको छ ।
लैङ्गिक हिंसाविरुद्धको १६ दिने अभियानमा महिला अधिकारको कुरा चलिरहँदा प्रजनन स्वास्थ्य अधिकारलाई जोड दिँदै महानगरका प्रवक्ता एवं वडा ५ का अध्यक्ष धनबहादुर नेपालीले शैक्षिक संस्थालाई सेनिटरी प्याडयुक्त बनाउने बताउनुभएको हो । वडाको शिक्षा समितिको आयोजना तथा वडा कार्यालयको सहयोग र सामाजिक जागरणका लागि नारी अभियानको पहलमा वडा नं ५ का सम्पूर्ण शैक्षिक संस्थालाई पहिलो सेनिटरी प्याडयुक्त घोषणा गरिएको छ ।
प्रवक्ता नेपालीले रजस्वला, किशोरीको स्वास्थ्यसँग जोडिएको संवेदनशील विषय भएकाले महानगरले अब सबै वडामा सेनिटरी प्याडयुक्त शैक्षिक संस्था बनाउन पहल गर्ने बताउनुभयो । उहाँले भन्नुभयो, “यो देख्दा सानो होला यद्यपि यसले किशोरीको स्वास्थ्य र मनोविज्ञानमा ठूलो असर पारेको छ, किशोरीको पढाइमा समेत असर पु¥याउने संवेदनशील विषय भएकाले सेनिटरी प्याड व्यवस्थापनमा महानगरले ध्यान दिनेछ ।” उहाँले वडाले ३० हजार रकम विनियोजित गरी वडा नं ५ का सम्पूर्ण शैक्षिक संस्थाका स्नानगृह र शौचालयमा सेनिटरी प्याड बक्स राखिने बताउनुभयो ।
सामाजिक अभियन्ता सुष्मा पौडेलले महानगरलाई निःशुल्क रुपमा शौचालयमा प्याड व्यवस्थापन गर्न अनुरोध गर्नुभएको थियो । उहाँले सफा शौचालय तथा स्वच्छ खानेपानीको व्यवस्थापनमा विद्यालयले ध्यान दिनुपर्नेमा जोड दिनुभयो ।
वडा नं ५ का सदस्य एवं सामाजिक अभियन्ता अञ्जु केसीले वडा नं ५ सेनिटरी प्याडयुक्त गर्ने पहिलो वडा भएको बताउनुभयो । उहाँले सबै वडामा स्वास्थ्य र सरसफाइको अभियान चलाएर किशोरीलाई प्रजनन स्वास्थ्यको बारेमा सुसूचित गराउने बताउनुभयो ।
कार्यक्रममा सहभागी जनप्रतिनिधि, विद्यालय व्यवस्थापन समिति, शिक्षक तथा विद्यार्थीले अबदेखि वडा नं ५ का सम्पूर्ण विद्यालय सेनिटरी प्याडयुक्त घोषणा भएकोले त्यसलाई व्यवहारमा उतार्न प्रतिबद्ध भएको जनाउनुभयो ।
(रासस)
