बारा,१२ पुस । बारामा शिक्षकको कुटपिटपछि कक्षा ७ मा पढ्ने एक छात्रको मृत्यु भएको छ। पिट्ने शिक्षक फरार छन्। कलैया उपमहानगरपालिका १ स्थित नमूना निमाविमा अध्यनरत पर्सा गाउँका वीरेन्द्र महतो मण्डलका छोरा १३ वर्षीय अजयकुमारको उपचारका क्रममा मृत्यु भएको खबर आजको कान्तिपुर दैनिकमा खबर छ । शिक्षक सोनालाल यादवले एक छात्राको विषयमा उजुरी आएको भन्दै सोमबार अजयलाई कुटेर तेश्रो घन्टी नसकिँदै घर पठाएको उनका सहपाठीले बताएका छन्।
विद्यायबाट उनको घर ३ किमी टाढा छ। घर पुगेको केही घन्टामै जिल्ला अस्पताल कलैया पुर्याइएका उनको उपचारका क्रममा मृत्यु भएको मेडिकल सुपरिटेन्डेन्ट त्रिभुवन झाले बताए। प्राथमिक तहका शिक्षक यादवले अजयलाई विद्यालय प्रांगणमा हात र बाँसको लठ्ठीले पैतालादेखि घाँटीसम्म कुटेको प्रत्यक्षदर्शी अजयकी साथी रीमा मण्डलले बताइन्। अजयको मृत्युपछि शिक्षक सोनालाल विरुद्ध प्रहरीमा उजुरी दिएको अजयका काका जितेन्द्रले बताए।
