काठमाडौं, १४ पुस । राष्ट्रिय खेलकुद परिषद् (राखेप) का सदस्य सचिव केशवकुमार विष्टले राखेपअन्तर्गत रहेको खेलकुद चिकित्सा तथा अनुसन्धान केन्द्रमा खेलाडी उपचार गराउन जाँदा डाक्टर नभेटिए आफूलाई जानकारी गराउन खेलाडीलाई अनुरोध गरेका छन् ।
दीर्घायु गुरु अस्पतालको सहयोगमा केन्द्रले आयोजना गरेको प्राथमिक स्वास्थ्य उपचारसम्बन्धी कक्षा तथा बृहत् स्वास्थ्य परीक्षणको उद्घाटनका अवसरमा सदस्य सचिव विष्टले सो कुरा बताएका हुन् । ‘खेलकुद चिकित्सा तथा अनुसन्धान केन्द्रमा उपचार गराउन जाँदा तपाईं राष्ट्रिय टिममा रहेका खेलाडीले डाक्टर भेट्नुभएन भने मलाई म्यासेज गरिदिनुस् । सम्बन्धितलाई तुरुन्त कारबाही हुन्छ । यो वा त्यो बहानामा कसैलाई उम्कन दिन्नँ,’ सदस्य–सचिव विष्टले भने । उनले अब महिनाको कम्तीमा एक दिन राष्ट्रिय टिममा रहेका खेलाडीका लागि शिविर सञ्चालन गरिने पनि जानकारी गराए ।
हाल विशेष प्रशिक्षणमा रहेका राष्ट्रिय टिमका ४३ खेलाडी र १६ प्रशिक्षकलाई लक्षित गरी कक्षा र शिविर सञ्चालन गरिएको हो । केन्द्रले १८ पुसमा सम्पूर्ण खेलाडी, प्रशिक्षक, कर्मचारी, पदाधिकारी र खेल पत्रकारलाई लक्षित गरी एकदिने निःशुल्क स्वास्थ्य शिविर सञ्चालन गर्न लागेको केन्द्रका प्रमुख तिलक नेपालीले जनाएका छन् । राजधानी दैनिकमा खबर छापिएकाे छ ।
