काठमाडाै, २२ पुस। छोराछोरीले कमाईको निश्चित रकम बाबुआमाको ब्यांंक खातामा जम्मा गर्नुपर्ने बाध्यकारी व्यवस्था गर्न लागिएको छ । ज्येष्ठ नागरिक सम्बन्धी ऐन २०६३ लाई संशोधन गर्दै सरकारले कानून निर्माणको तयारी गरेको हो । सरकारका प्रवक्ता एवम् सञ्चार तथा सूचना प्रविधि मन्त्री गोकुल बाँस्कोटाअनुसार ज्येष्ठ नागरिक सम्बन्धी ऐन २०६३ लाई संशोधन गर्न बनेको विधयक संसदमा पेश गर्न सरकारले स्वीकृती प्रदान गरेको छ ।
प्रस्तावित विधयकमा सार्वजनिक पद धारणा गरेका, अन्तर्राष्ट्रिय वा अन्तर सरकारी कार्यालयबाट नियमित आम्दानी गर्ने व्यक्तिले बाबुआमाको ब्यांक खातामा मासिक रुपमा रकम जम्मा गर्नुपर्नेछ । त्यसैगरी, प्रचलित कानूनअनुसार स्थापना वा दर्ता भएका संस्थाबाट नियमित रुपमा तलव बुझ्ने, स्वरोजगार तथा अन्य पेशा व्यवसायबाट आम्दानी गर्नेहरु पनि उक्त दायरामा पर्ने मन्त्री बाँस्कोटाले बताए ।
कानून बमोजिम छुट्टै बसेको अवस्थामा पनि रकम जम्मा गर्नुपर्ने व्यवस्था गरिएको छ । बाबुआमा सगोलमा बसेका भए संयुक्त रुपमा र भिन्न बसेको अवस्थामा आफूले पालनपोषण गर्ने आमाबाबुको खातामा रकम जम्मा गर्नुपर्नेछ । त्यसैगरी, विधयकमा आमाबुबाको सुरक्षामा ख्याल गर्नुपर्ने, दुव्र्यवहार गर्न नहुने र झुक्याएर सम्पत्ति लिन नपाइने व्यवस्था प्रस्ताव गरिएको छ । यसो गरेको पाइए कानून अनुसार कारबाही गरिने मन्त्री बाँस्कोटाले जनाएका छन् ।
