विराटनगर,२७ पुस। झापा, सुनसरी र मोरङ जिल्लामा छुट्टाछुट्टै स्थानमा सवारी दुर्घटना हुँदा ३ जनाको मृत्यु भएको छ भने २ जना घाइते भएका छन् । झापाको कन्काई नगरपालिका-३ टप्पु चोकमा मोटरसाईकल दुर्घटना हुँदा १ जनाको मृत्यु भएको छ । मे ५ प ९१९८ नम्बरको मोटरसाईकल आँफै अनियन्त्रित भई कल्भटमा ठोक्किएर भएकाे दुर्घटनामा परि मोटरसाईकलमा सवार कन्काई नगरपालिका-३ बस्ने बर्ष २१ को हप्पन मुर्मुको घटना स्थलमा नै मृत्यु भएको हो । त्यसैगरी सुनसरीको दुहबी नगरपालिका-४ मलहट्टीमा मोटरसाईकल अनियन्त्रित भई दुर्घटना हुँदा १ जनाको ज्यान गएको छ भने २ जना घाइते भएका छन् । भित्री सडक खण्डमा पूर्वबाट पश्चिम तर्फ आउँदै गरेको को १९ प २४४३ नम्बरको मोटरसाईकल आँफै अनियन्त्रित भई बुढी पुलमा ठोक्किएर दुर्घटना भएको थियो । दुर्घटनामा परि मोटरसाईकलमा सवार चालक दुहबी नगरपालिका-९ बस्ने बर्ष २२ को अजय चौधरी, पछाडी सवार बर्ष २० को जोग नारायण चौधरी र मोरङ बुढीगंगा गाउँपालिका-३ बस्ने बर्ष २५ को उमेश थान्दार घाइते भएका थिए । घाईते मध्ये थान्दारलाई थप उपचारको लागि विराट नर्सिङहोम लगिएकोमा उपचारको क्रममा मृत्यु भएको इलाका प्रहरी कार्यालय दुहबीले जनाएको छ । यस्तै मोरङको धनपालथान गाउँपालिका-३ भलुवा खोलामा ट्याक्टर दुर्घटना १ जनाको मृत्यु भएको छ । भित्री सडक खण्डमा खेतमा पानी पटाउने मेशिन बोकेर जाँदै गरेको को. २ त. ४८६५ नम्बरको ट्याक्टर आँफै अनियन्त्रित भई दुर्घटना भएको थियो । दुर्घटनामा परि ट्याक्टरका चालक भारत अररिया कुवाडी गाउँ बस्ने बर्ष ४० को अशोक सरदारको घटनास्थलमा नै मुत्यु भएको प्रदेश प्रहरी कार्यालय विराटनगरले जनाएकाे छ ।
