सुनसरी, माघ २ ।
इलाममा अनशनरत् डा. गोविन्द्र केसीको स्वास्थ्यमा समस्या आएपछि थप उपचारका लागि सुनसरीको धरानस्थित बीपी कोइराला स्वास्थ्य विज्ञान प्रतिष्ठानबाट विशेषज्ञ चिकित्सकहरुको टोली इलाम प्रस्थान गरेको छ ।
बुधबार प्रतिष्ठानका सहायक निर्देशक डा. विकास साहको नेतृत्वमा चिकित्सकहरुको टोली केसीको उपचारका लागि इलाम गएको हो ।
डा. केसीको स्वास्थ्यमा समस्या आएको भन्दै स्वास्थ्य मन्त्रालयको निर्देशनपछि केसीको थप उपचारका लागि प्रतिष्ठानबाट विशेषज्ञसहितको टोली इलाम पठाइएको प्रतिष्ठानका निर्देशक गौरीशंकर साहले जानकारी दिए ।
प्रतिष्ठानका मुटुरोग विशेषज्ञ डा. प्रशान्त साह, जेनेरल फिजिसियन डा. अजय यादव, एनेस्थेसिायोलोजी डा. सविन भण्डारी, ल्याब टेक्निसियन जितेन्द्र यादव र आइसीयु नर्स निर्मला बस्नेतलाई डा. केसीको उपचार गर्न इलाम पठाइएको हो ।
एन्टिबायोटिक औषधि दिन सुरु
इलाममा ८ दिनदेखि अनशनरत् डा. गोविन्द केसीको स्वास्थ्य अवस्था बिग्रँदै गएपछि स्लाइनबाट एन्टिबायोटिक औषधि दिन सुरु गरिएको छ ।
जिल्ला अस्पताल इलामले केसीको स्वास्थ्य अवस्था निकै कमजोर हुँदै गएकाले उनकै सहमतिमा आइभी एन्टिबायोटिक औषधि दिन सुरु गरिएको जनाएको छ । उपचारमा संलग्न निमित्त मेडिकल सुपरिटेन्डेन्ट डा. विजेन्द्रकुमार साहले डा. केसीलाई अन्य कुनैपनि औषधि भने प्रयोग नगरिएको जानकारी दिए ।
उनले अनशनरत् डा. केसीको मुटुको चाल घटेर ३५ र बढेर २०० सम्म पुग्ने गरेको र शरीरमा अक्सिजनको मात्रा घटेर ८० प्रतिशतसम्म आइपुगेको बताए ।
डा. साहकाअनुसार केसीलाई आइसीयुमा राख्नुपर्ने भएपनि अस्पतालमा आइसीयु नभएकाले उपचारमा समस्या देखिएको छ ।
