विराटनगर १० माघ । विराटनगर ५ मा रहेका एभरेष्ट बोर्डिङ स्कुलले आफ्नो रजत जयन्ती तथा २५ औं अभिभावक दिवस विभिन्न कार्यक्रमका साथ शुरु गरि मनाएको छ ।
दुईदिनसम्म चल्ने कार्यक्रमको पहिलो दिन प्राथमिक तहका बालबालिकाले विभिन्न साँस्कृतिक महत्व झल्कने सांगितिक कार्यक्रम सहित आ–आफ्ना प्रतिभा प्रस्तुति देखाएर मनाएका छन् ।
उद्घाटन कार्यक्रमका प्रमुख अतिथि जिल्ला समन्वय समितिका प्रमुख नरेश पोखरेलले गुणस्तरीय शिक्षा प्रदान गर्दै निजी विद्यालयले राज्यका लागि ठुलो सहयोग गरेको बताउनुभयो । उहाँले पछिल्ला समयमा आइरहेका निजी विद्यालयको विस्थापनको विषयतर्फ संकेत गर्दै त्यसो हुन नसक्ने बताउनुभयो । 
उहाँले निजी क्षेत्रलाई निरुत्साहित पार्नु भन्दा सरकारी तथा सामुदायिक विद्यालयहरुको गुणस्तर बृद्धिमा ध्यान दिन आवश्यक रहेकोमा जोड दिनुभयो । विद्यालयका प्रिन्सिपल टीकाराम पुरीले २५ वर्ष अघि ८० जना विद्यार्थीबाट शुरु भएको विद्यालयले प्राप्त गरेको सफलताको श्रेय अभिभावकलाई दिनुभयो । रजतजयन्ती मनाइरहँदा उहाँले बितेका संघर्षलाई स्मरण गर्दा उपस्थित अतिथि र अभिभावक भावुक भएका थिए ।
उनले शुरुका दिनमा जति संघर्ष गरेपनि एकपछि अर्को सफलताप्राप्त गर्दै जाँदा थप जिम्मेवार बन्न प्रेरित गरेको समेत बताउनुभयो ।
बालबालिकाले विभिन्न तहमा देश तथा प्रदेश उत्कृष्ट बन्दै देखाएको मेहनत, शिक्षक, कर्मचारीको मेहनत र अभिभावकको अटुट माया र विश्वासप्रति आफू प्रफुल्ल रहेको बताएका प्रिन्सिपल पुरीले यसलाई कायम राख्न निरन्तर लागिपर्ने बताउनुभयो । 
विद्यालयका अध्यक्ष विनोद ढकालको अध्यक्षतामा भएको कार्यक्रममा शिक्षासेवीहरु केशवसिंह सुवाल, अभिभावक संघ प्रदेश अध्यक्ष देवीपन्थी लगायतकाले एभरेष्टको उत्कृष्टताको प्रंशसा गर्दै यसलाई कायम राख्न शुभकामना दिनुभयो । भोली शुक्रबार पनि प्रदेश १ का सभामुख प्रदिप भण्डारीको प्रमुख आतिथ्यतामा विभिन्न कार्यक्रमहरु हुने विद्यालयका प्रिन्सीपल टिकाराम पुरीले बताउनुभयो ।
