काठमाडौं माघ १६ ।
हृदयघात भएर अस्पताल भर्ना भएका पूर्व युवराज पारस शाहको अवस्था सुधारोन्मुख रहेको उपचारमा संलग्न चिकित्सकहरुले बताएका छन् । उनको स्वास्थ्य सुधारोन्मुख तथा स्थिर भएकाले सिसियुबाट क्याबिनमा सारिएको आज अस्पतालले जारी गरेको प्रेस विज्ञप्तिमा उल्लेख छ ।
छातीमा अतिशय पीडा भएपछि सोमबार अपराह्न नर्भिक अस्पतालको आकस्मिक कक्षमा भर्ना भएका थिए । सो समयमा उनको एउटा मुटुको धमनी टालिएको थियो । अस्पतालका मुटुरोग विभाग प्रमुख डा. यादवदेव भट्टको नेतृत्वमा बन्द भएको धमनी तुरुन्तै खुला गरिएको थियो । पूर्व युवराज शाह अहिले आगन्तुकसँग बोल्न, खाने र स्वासप्रस्वास प्रक्रिया सामान्य रहेको उपचारमा संलग्न चिकित्सक डा. भट्टले बताए ।
