काठमाडौँ, चैत ४।
प्रहरी प्रधान कार्यालयले हिंसात्मक गतिविधिमा संलग्न नेकपा (विप्लव) समूहप्रति ‘चनाखो’ भएर सुरक्षा सतर्कता अपनाउन मुलुकभरका प्रहरी कार्यालय तथा युनिटहरुलाई निर्देशन गरेको छ ।
सरकारले नेत्रविक्रम चन्द (विप्लव) ले नेतृत्व गरेको नेकपाका गतिविधिमाथि प्रतिवन्ध लगाएको छ । यो समूहले हिंसात्मक तथा उच्छृङ्खल गतिविधि सञ्चालन गर्न थालेपछि समूहमा आवद्ध नेता तथा कार्यकर्ता धमाधम पक्राउ पर्न थालेका छन् ।
केन्द्रीय प्रहरी प्रवक्ता उत्तमराज सुवेदीले पक्राउ परेकाहरुमाथि विभिन्न जिल्ला प्रहरी कार्यालयमा मुद्दा दर्ता भएकाले अनुसन्धानका लागि नियन्त्रणमा लिएको स्पष्ट पार्नुभयो ।
जवरजस्ती चन्दा असुलीदेखि बम विष्फोटका घटनामा संलग्न ब्यक्तिमाथि मुद्दा दर्ता भएका छन्, ती ब्यक्तिलाई अनुसन्धानका लागि पक्राउ गर्नै पर्ने हुन्छ उहाँले थप्नुभयो–“अन्य ब्यक्तिको खोजी भइरहेको छ ।”
७७ वटै जिल्ला प्रहरी कार्यालय, शसस्त्र प्रहरी कार्यालय र ती कार्यालय अन्तर्गतका प्रहरी युनिटहरुमा उच्च सुरक्षा सतर्कता अपनाएको प्रहरीले जनाएको छ । जिल्लाका ग्रामीण बस्तीहरुमा पनि सुरक्षागस्ती बढाउनुका साथै अबैध हतियार बुझाउन अपिल गरिसकेको छ ।
त्यस्तैं, नेपाल सरकारका विशिष्ट ब्यक्तिको शान्ति सुरक्षामाथि नै धावा बोल्ने, सर्वसाधारणको ज्यान लिनेजस्ता आपराधिक घटना एकपछि अर्को हुन थालेपछि विप्लव समूहमाथि प्रतिवन्ध लगाउन सरकार बाध्य भएको बताएको छ ।
सरकारले विप्लव समूहका सम्पूर्ण गतिविधि नियन्त्रण गर्ने जिम्मेवारी नेपाल प्रहरीलाई दिएको छ । अबैध हतियार तथा विष्फोटक पदार्थ बरामदका लागि सशस्त्र प्रहरी बल परिचालन गरिएको छ । जवरजस्ती चन्दा आतङ्क, अपहरण तथा बम विष्फोटनका घटनामा संलग्न रहेको अभियोगमा प्रहरीले हालसम्म ७० जनालाई नियन्त्रणमा लिएको छ ।
पक्राउ परेकाहरुमाथि हतियार खरखजना, विष्फोटक पदार्थ ओसारपसार तथा चन्दा असुली र धम्की लगायतका विभिन्न मुद्दामा कानुनी कारवाही भइरहेको प्रहरीले जनाएको छ ।
पक्राउ पर्नेहरुमा पूर्वअयोग्य माओवादी लडाकुदेखि विप्लव समूहका पोलिटब्यूरो सदस्य मोहन कार्की, केन्द्रीय नेता तथा कार्यकर्ता छन् ।
सो समूहका महासचिव नेत्रविक्रम चन्द ‘विप्लव, पूर्वमन्त्री खड्गबहादुर विश्वकर्मा ‘प्रकाण्ड’, हेमन्तप्रकाश ओली ‘सुदर्शन’, धर्मेन्द्र बास्तोला ‘कन्चन’, अनिल शर्मा विरही र उमा भुजेल ‘शिलु’ भूमिगतशैलीमा सक्रिय छन् ।
