विराटनगर, १६ चैत ।
दक्षिण भारतबर्षकै प्रखर बिद्घान ब्यक्तित्व त्रिदण्डी श्रीमन्नारायण रामानुज चिन्नजीयर स्वामीलाई शनिवार विराटनगरमा नागरिक अभिनन्दन गरिएको छ ।विराटनगर ४ मा नवनिर्वित श्रीलक्ष्मीनारायण मन्दिरको भगवत्प्राण –प्रतिष्ठा समारोहमा सहभागी बन्न आएको अबसर पारेर विराटनगर महानगरपालिका र नरेन्द्रप्रसाद आशालता रिजाल प्रतिष्ठानले सम्युक्तरुपमा उहाँहरुको अभिनन्दन गरेको हो । 
विराटनगर महानगरका मेयर भीम पराजुलीले ताम्रपत्र सहितको नागरिक अभिनन्दन गरिएको प्रमाणपत्र त्रिदण्डी श्रीमन्नारायण रामानुज चिन्नजीयर स्वामीलाई प्रदान गरेका थिए । यस्तै नगेन्द्रप्रसाद आशालता रिजाल प्रतिष्ठानले प्रदान गर्दै आएको दुई पुरस्कार समेत सोही अवसरमा प्रदान गरिएको छ ।
प्रतिष्ठानकी अध्यक्ष इन्दिरा रिजाल, सामाजिक विकास मन्त्री जीवन घिमिरे तथा मेयर भीम पराजुलीले १ लाखको धर्म संस्कृति पुरस्कार चिन्नजीयर स्वामीलाइ र बाङ्गमय पुरस्कार गायत्री स्वरुपाश्रम झापालाई १ लाख रुपैया प्रदान गरेका हुन् ।
अभिनन्दन कार्यक्रममा बोल्दै सामाजिक विकास मन्त्री जीवन घिमिरेले धार्मिक ,सांस्कृतिक तथा बैज्ञानिक प्रविधीलाई समेत मिलाएर काम गर्न आबश्यक रहेको औल्याए । नैतिकता र इमान्दारिताका लागि धर्म जागरण आबश्यक भएको र यसको संरक्षण र सम्बद्घनका लागि प्रदेश सरकार सदैब तयार रहेको बताए ।
यस्तै विराटनगर महानगरका मेयर भीम पराजुलीले दक्षिण भारतबर्षकै प्रखर बिद्घान र सामाजिक ब्यक्तित्वको नागरिक अभिनन्दन गर्न पाउदा खुसी भएको बताए । धर्म ,संस्कृति , नैतिकता र इमान्दारिता समाजको गहना भएको भन्दै मेयर पराजुलीले धार्मिक गतिविधि र कार्यक्रमलाई आफुले उच्च महत्व दिएको बताए ।
मेयर पराजुलीले विराटनगर महानगरलाई उच्च नैतिकवानहरुको सहर र धार्मिक नगरी बनाउने महाअभियानमा आफु उभिएको बताए ।
