विराटनगर, २६ चैत ।
विराटनगरको ब्यस्त बजारमा धमाधम बिजुलीका पोलहरु सार्ने र तार मिलाउने काम भईरहेको छ ।
सडकको विस्तारसँगै विचमा भएका विजुलीका पोलहरु सार्नको लागि ठेकेदार कम्पनीहरुले काम गरेका हुन् । तर जसरी काम गर्नु पर्ने हो त्यो अनुसारका सुरक्षित मापदण्ड प्रयोग गरिएको छैन । दिनभरी झुण्डिएर गरिने कामले कामदार असुरक्षित छन् । बिजुलीका पोलमा काम गर्ने कामदारहरुको हातमा न ग्लोब थियो, केही ठाउँमा हेल्मेट लगाएको भएपनि जुत्ता र ग्वोब समेत नहुँदा कामदार असुरक्षित रुपमा काम गरेको स्थानीय शुभम दुगरले बताए ।
सामान्य मापदण्ड समेत पुरा नभएकोमा स्थानीयलाई पटकै चित बुझेको छैन । सोमबार दिउँसो मेनरोडको अतिथी सदन नजिकै पोलमा काम गर्दै गरेका कामदारहरु असुरक्षित रुपमा काम गरेको धेरै प्रत्यक्षदर्शीलाई चित बुझेको थिएन ।
केही दिन अगाडीमात्र भृकुटीचोकमा विजुलीको पोलमा काम गर्ने क्रममा करेन्ट लागेर एकजनाको अबस्था गम्भीर भएको थियो । त्यसपछि कडाई गरेको जनाएको बिद्युत प्राधिकरणले अनुगमन नगर्दा ठेकेदार कम्पनीहरुले मनपरी रुपमा विजुलीका पोलहरुमा सुरक्षाका साधनहरु नअपनाई मजदुरलाई काम गराउँदै आएको दुगरले बताए ।
नेपाल विद्युत प्राधिकरणका प्रमुख राजिवकुमार सिंहले सुरक्षाको मापदण्ड नअपनाउने ठेकेदार कम्पनीलाई कार्वाही गरिने बताएका छन् । उनीहरुलाई पटक–पटक सुरक्षा मापदण्डमा रहेर काम गर्न भनिएको तर अटेर गर्दै आएकाे बताए । 
