एजेन्सी, ८ वैशाख । श्रीलंकामा आइतबार भएको श्रृङ्खलावद्ध विस्फोट पश्चात श्रीलंका सरकारले देशभर कर्फ्यूको घोषणा गरेको छ।
विस्फोटमा २०७ जनाको मृत्यु भएको छ भने कम्तिमा ४५० जना घाइते भएका छन्। मृतकको संख्या अझै बढ्न सक्ने बताइएको छ।
विभिन्न आठ ठाउँमा भएको विष्फोटमा खासगरी होटल र चर्चलाई निशाना बनाइएको छ। विष्फोटमा ३५ जना विदेशी नागरिक समेत मारिएकाे समेत बताइएको छ। अहिलेसम्म कसैले पनि विष्फोटको जिम्मेवारी लिएको छैन। प्रहरीले विष्फोटमा संलग्न भएको आशंकामा ७ जनालाई पक्राउ गरेको छ।
घटनाको अवस्थाको बारेमा जानकारी लिन श्रीलंकाका प्रधानमन्त्री रानिल विक्रमासिंघेले मन्त्रीपरिषद्को आपतकालिन बैठक बोलाएका छन्।
यस्तै विष्फोटलाई मध्यनजर गर्दै प्रहरी र डाक्टरहरुकाे विदा रद्द गरिएको छ भने विदामा रहेका डाक्टर र नर्सहरुलाई ड्युटीमा बोलाइएको छ। साथै सरकारले सोमबार र मंगलबार विद्यालयहरु बन्द गर्न आदेश दिएको अन्तराष्ट्रिय सञ्चार माध्यमले जनाएका छन्।
